የሀገር ውስጥ ዜና

ዜና ከኢትዮጵያ ውስጥ

ሚኒስቴሩ ከ37 ሚሊየን በላይ ዜጎችን ከወባ ወረርሽኝ መከላከል መቻሉን አስታወቀ

  • PDF

አዲስ አበባ ፤ጥር 28/2008 (ዋኢማ) - በአገሪቱ  የተለያዩ ወባማ  አካባቢዎች የሚኖሩ ከ37 ሚሊየን በላይ የሚሆን  ህዝብን ከወባ ወረርሽኝ ለመከላከል መቻሉን  የጤና ጥበቃ ሚኒስቴር አስታወቀ፡፡

በሚኒስቴሩ የወባ ፕሮግራም ተወካይ አስተባባሪ አቶ ደረጀ ድሉ ለዋልታ እንደገለጹት፤ የክረምቱን ዝናብ ተከትሎ ሊከሰት የሚችለውን የወባ ወረርሽኝ ለመከላከል የኬሚካል ርጭትና የአጎበሮች ስርጭት ተካሂዷል ፡፡

በዚህም መሠረት ባለፉት ስድስት ወራት ከ4 ነጥብ 3 ሚሊየን በላይ ቤቶችን የፀረ ወባ መድሓኒት ርጭትን ለማካሄድ  ታቅዶ 3 ሚሊየን 988ሺ 540 የሚደርሱ  የመኖሪያ ቤቶች ላይ  የፀረ ወባ መድሓኒት  ርጭት መካሄዱን አቶ ደረጄ አመልክተዋል ።
ከአፋር ክልል በስተቀር በሁሉም ክልሎች የፀረ-ወባ መድሐኒት  ርጭት ሥራው ሙሉ በሙሉ የተጠናቀቀ ሲሆን  ፤በአፋር ክልልም ቢሆን ርጭቱ እየተከናወነ መሆኑንና በቅርቡ እንደሚጠናቀቅ አቶ ደረጀ አስታውቀዋል ።

በአገሪቱ  የቅድመ ወባ መከላከል ሥራውን  የተሻለ  ለማድረግ ከ28 ሚሊየን በላይ አጎበሮችን  ወደ ወባማ ወረዳዎቹ በማሠራጨት 24 ሚሊየን 256 ሺ 397 የሚሆኑ  የአገሪቱ ህዝብ ተጠቃሚ መደረጉን  አቶ  ደረጄ ገልጸዋል  ።
ህብረተሰቡ እራሱን ከወባ ትንኝ ንክሻ እንዲጠብቅ፣ የመኝታ አጎበር በአግባቡ እንዲጠቀም፣ በፀረ ትንኝ ኬሚካል የተረጩ ቤቶችን  በአግባቡ እንዲይዝ፣ለወባ ትንኝ መራቢያ ምቹ ቦታዎችን እንዲያስወግድ ሰፋፊ  የግንዛቤ ማስጨበጫ ሥራዎች እንደተካሄዱ አቶ ደረጄ  አስረድተዋል ።

ማንኛውም ሰው በበሽታዉ ቢያዝ ወደ ጤና ተቋማት በአፋጣኝ በመሄድ ተገቢዉን ምርመራና ህክምና እንዲያደርግ ተወካዩ ማሳሰባቸውን ዋልታ ኢንፎርሜሽን ማዕከል ዘግቧል፡፡ 

የቻይና ባህል ቡድን በአዲስ አበባ ትርኢት አቀርበ

  • PDF

አዲስ አበባ፤ ጥር 28/2008(ዋኢማ)- የቻይና ባህላዊ ቡድን የቻይናን አዲስ ዓመት በዓል  በማስመልከት በአዲስ አበባ ከተማ ትርኢት ማቅረቡ ተገለጸ ።                    
የቻይና የባህል ቡድን አቻ ከሆነው የኢትዮጵያ የባህል ቡድን ጋር በመሆን በብሔራዊ ትያትር ትርኢቱን ያቀረበ ሲሆን ቻይናውያን ተጋባዥ እንግዶችን ጨምሮ ኢትዮጵያውያን  እንግዶች  ተገኝተዋል ።

የቻይና  የባህል ቡድን  የቻይናን  የባህል  ሙዚቃ ½ዳንስና  ሌሌች የጥበብ ሥራዎችን  ለታዳሚያን  ያቀረቡ   ሲሆን  የኢትዮጵያ  ባህል ቡድንም የባህል ጭፈራዎችን ½የአክሮባትና የስርከስ ትርኢቶችን  እንዳቀረበ ተመልክቷል ።      
በትርኢቱ  መክፈቻ  ሥነ ሥርዓት ላይ   የተገኙት  በኢትዮጵያ የቻይና  ባለሙሉ ሥልጣን አምባሳደር ላ ይፋን  በበኩላቸው    እንደገለጹት እንደዚህ አይነት  ዝግጅቶች በኢትዮጵያና  በቻይና መንግሥታትና  መካከል የሚኖረውን እና የሁለቱ አገራት የህዝብ ለህዝብ ግንኙነትን እንዲሁም  የባህል   ይበልጥ  ያጎለብተዋል ብለዋል  ።

የቻይናው አምባሳደር ለዥንዋ እንደገለጹት የቻይና የባህል ቡድን ከኢትዮጵያ አቻው ጋር   በመሆን ያቀረበው የመድረክ ትርኢት አስደናቂ መሆኑንና በአዲስ አበባ የሚገኙ ከ10ሺ በላይ  የሚሆኑ ቻይናውያን የአዲስ ዓመት በዓላቸውን ከኢትዮጵያውያን  ዜጎች ጋር  በመሆን እንዲያከብሩ አግዟል።

ኢትዮጵያ   የጥንታዊ ሥልጣኔ  ባለቤትና የብዙ ቅርሶች ባለቤት በመሆኗ  በአዲስ አበባ  የተገኙ ቻይናውያን የጥበብ  ሰዎች  ሊማሩበት  እንደሚችሉ  የተናገሩት  አምባሳደሩ  ቻይናውያን  ትርኢት አቅራቢዎች ባሳዩት  የመድረክ  ሥራ  እጅጉን   መደሰታቸውን አክለው ገልጸዋል  ።

በብሔራዊ ቲያትር የተገኙ የመድረክ ዝግጅት ኢትዮጵያውያን ለዠንዋ እንደገለጹት የመድረክ ዝግጅቱ   በጣም  ሳቢ  ከመሆኑም  በላይ  የሁለቱን አገራት  የባህልና የህዝብ ለህዝብ ግንኙነት  የሚያጠናክር ነው ። 
.በመድረክ   ዝግጅቱ ታዳሚ   የነበሩት  ተስፋዬ  አበጀና አላዛር ወንድወሰን    የመድረክ  ዝግጅቱ  አስደሳች  ሆኖ እንዳገኙትና   የቻይናን  ባህል  እንዲያውቁ  መልካም  አጋጣሚ  እንደሆነ  ተናግረዋል  ።
ኢትዮጵያና ቻይና  ዘላቂና  ታሪካዊ  የሆነ  ግንኙነት  የመሠረቱ አገራት  ሲሆኑ ግንኙነቱን  ወደ  የላቀ ደረጃ ለማሸጋገር  እየሠሩ ይገኛሉ ።(http://www.china.org)

ባለሥልጣኑ ባለፉት ስድስት ወራት በ67 ሠራተኞች ላይ እርምጃ ወሰደ

  • PDF

አዲስ አበባ፤ ጥር 27/2008(ዋኢማ)- የኢትዮጵያ ገቢዎችና ጉሙሩክ ባለሥልጣን በተያዘው በጀት ዓመት ስድስት ወራት ከሥነ ምግባርና ብልሹ አሠራር ጋር በተያያዘ በ67 ሠራተኞች ላይ የተለያዩ እርምጃዎች መውሰዱን አስታወቀ፡፡

ባለስልጣኑ የመልካም አስተዳደር ጉድለትን ለማስወገድ የጀመረውን ጥረት በማጠናከር የተጣለባቸውን ኃላፊነት በአግባቡ ባልተወጡ ሠራተኞች ላይ ህጋዊ እርምጃዎችን እየወሰደ መሆኑን በባለሥልጣኑ የዕቅድና አፈፃፀም ክትትል ዳይሬክተር አቶ ሲሳይ ባህሩ ለዋኢማ ገልፀል፡፡

ባለፉት ስድስት ወራት ብቻ እርምጃ ከተወሰደባቸው 67 ሠራተኞች 22 የሚሆኑት ከኪራይ ሰብሳቢነትና ተያያዥ ጉዳዮች ጋር በተያያዘ የሥነ- ምግባር ጉድለት በማሳየታቸው ከሥራ እንዲሰናበቱ ተደርጓል፡፡ 45 ሠራተኞች ደግሞ የተሠጣቸውን ኃላፊነት በአግባቡ ባለመወጣታቸውና የተለያዩ ግድፈቶች በማሳየታቸው የዲስፕሊን እርምጃ ተወስዶባቸዋል፡፡
የዲስፒሊን እርምጃው ከአራት ወር የደመወዝ ቅጣት እስከ የጽሁፍ ማስጠንቀቂያ የሚደርስ መሆኑን አቶ ሲሳይ ተናግረዋል፡፡ ከዚህ በተጨማሪም በተመደቡበት ሥራ ላይ ጥሩ አፈፃፀም ያላስመዘገቡ ሠራተኞችን ወደ ሌላ ክፍል የማሸጋሸግ ሥራ መከናወኑንም ዳይሬክተሩ አስታውሰዋል፡፡

እያንዳንዱ ፈጻሚ አካል በሥራው ውጤት ተለክቶ ጥሩ ሲሰራ የሚበረታታበት፤ ጥሩ ሳይሰራ ሲቀር  ተጠያቂ የሚሆንበትና የሚስተካከልበት፤ የተጠበቀውን ውጤት ማምጣት ካልቻለ ደግሞ አስፈላጊው የእርምት እርምጃ የሚወሰድበት ሥርዓት ተጠናክሮ መቀጠሉን አቶ ሲሳይ ተናግረዋል፡፡

ከግብር ከፋዮች የሚነሱ ቅሬታዎችን በአግባቡ ለመፍታትና ለችግሮች ፈጣንና ዘላቂ መፍትሔ ለማበጀት ባለሥልጣኑ ከባለድርሻ አካላት ጋር ለመወያየትና ለመመካከር የተለያዩ መድረኮችን እያዘጋጀ ይገኛል፡፡ለኢንቨስትመንትና ለልማታዊ ባለሃብቱ አመቺ ሁኔታ ለመፍጠርና የኪራይ ሰብሳቢነት አመለካከትና ተግባር ለመናድ ቁርጠኛ አቋም መያዙን ዳይሬክተሩ አስታውቀዋል፡፡

ግብር ከፋዮችም በህጉ መሠረት የሚጠበቅባቸውን ግብርና ታክስ በወቅቱ በመክፈል ግዴታቸውን እንዲወጡ አሳስበዋል፡፡ ችግሮች ሲመለከቱ ለሚመለከታቸው አካላት በማሳወቅና በመጠቆም የሚፈለገው ውጤት እንዲመጣ የበኩላቸውን ሊወጡ እንደሚገባ ተመልክቷል፡፡

ለዋኢማ አስተያየታቸውን የሠጡ  ግብር ከፋዮች እንዳሉት መልካም አስተዳደርን ለማስፈን የተጀመሩት ሠራዎች ተጠናክረው መቀጠል አለባቸው፡፡ ግብር ከፋዮች ሳይጉላሉ የሚፈለገውን አገልግሎት በግልፅነት፣ፍትሃዊነት በፍጥነት የሚያገኙበትን ሥርዓት ለማጠናከር ባለስልጣኑ የጀመረውን ጥረት በደንብ ሊገፋበት እንደሚገባም  ገልጸዋል፡፡

የኢትዮ-ኬንያ የኤሌክትሪክ መሥመር ዝርጋታ በመጪው ግንቦት ወር ይጀመራል

  • PDF

አዲስ አበባ፤ ጥር 28/2008(ዋኢማ)- 612 ኪሎሜትር እርዝመት ያለው የኢትዮ- ኬንያ የኤሌክትሪክ ኃይል ማስተላላፊያ መስመር በመጪው ግንቦት ወር  እንደሚጀመር  የኬንያ የኤሌክትሪክ  ትራንስሚሽን ኩባንያ ትናንት አስታወቀ ።    
የኩባንያው ዋና ዳይሬክተር ተወካይ ፈርናንዴስ ባሪሳ እንደገለጹት ከሞያሌ ወደ ኬንያ ከፍተኛ የኤሌክትሪክ ኃይል የሚሸከመው መሥመር ዝርጋታ የምህንድስናና የዲዛይን  ፕሮጀክት ሥራውና አስፈላጊው የካሳ ቅድሚያ ዝግጅት መጠናቀቁ ተገልጿል ።

በናይሮቢ ለሚዲያ  በተሠጠው መግለጫ የኤሌክትሪክ ኃይል ማስተላላፊያ መሥመር ዝርጋታ ፕሮጀክቱን ለማስጀመር የሚያስችሉ ቅድመ ሁኔታዎች በጥሩ ሁኔታ እየተከናወኑ መሆኑ  የተጠቆመ ሲሆን በአጠቃላይ  በ129  ቢሊዮን  ሽልንግ ወጪ ሥራው የሚከናወነው  የኢትዮ-ኬንያ የኤሌክትሪክ መሥመር ዝርጋታ የማርሳቢት፤ ሳምቡሩ ፤ አይሶሎ ፤ ሊያኪፓ፤ ኒያንዱራ  እና ናኩሩ አካባቢዎችን  በኤሌክትሪክ መሥመር ያገናኛል ።

በኬንያ በመላ አገሪቱ በአጠቃላይ 5ሺ ኪሎሜትሮች እርዝመት ያለው የከፍተኛ ኃይል ተሸካሚ የኤሌክትሪክ ኃይል መሥመር እኤአ እስከ 2018 ድረስ ለመዘርጋት ዕቅድ የያዘች ሲሆን በተጨማሪ ከሞምባሳ-ናይሮቢናኦሊካራ-ሌሶስ-ኪስሚዩ የኤሌክትሪክ ማስተላለፊያ መሥመሮችን  በመዘርጋት  5ሺ ሜጋዋት የኤሌክትሪክ ኃይልን ለማሠራጨት እንቅስቃሴዎች እየተደረጉ ነው ።

ሚስተር ባሪሳ እንደገለጹት  የመሬት ካሳ  በተመለከተ ኮንትራክተሮች  እንዳይቸገሩ  አስቀድሞ አስፈላጊ ሥራዎች  የተከናወኑ ሲሆን  የኢትዮ-ኬንያ የኤሌክትሪክ መስመር  በሚላልፍባቸው  ቦታዎች  በሙሉ  ቅድመ ሥራዎች  በመልካም  ሁኔታ ላይ የሚገኙ ሲሆን   በተጨማሪነት 2ሺ ሜጋ ዋት የኤሌክትሪክ  ማስተላላፊያ መሥመር ዝርጋታው እኤአ በታህሳስ 2018 መሆኑ  ተገልጿል ።

የኬንያ ጎረቤት አገር የሆነችው ኢትዮጵያ 45ሺ ሜጋ ዋት የኤሌክትሪክ ኃይል የማመንጨት እምቅ አቅም ያላት ሲሆን የኬንያን የኃይል ፍላጎት በሟሟላት በኩል ትልቅ ሚና እንደሚኖራተ ተመልክቷል ።   
ኢትዮጵያ 6ሺ ሜጋዋት የሚያመነጭ  የታላቁ ህዳሴ ግድብን  እየገነባች  መሆኑን  የጠቆመው  ዘገባው  ኬንያ  በርካሽ ዋጋ  የኤሌክትሪክ ኃይል  በግዥ የማግኘት እድሏ  የሰፋ ነው ። (http://www.the-star.co.ke)

ከ1 ነጥብ 1 ቢሊዮን ብር በላይ ባጎደሉ አመራርና ፈፃሚዎች ላይ ምርመራ እየተደረገ ነው

  • PDF

አዲስ አበባ፣ ጥር 27/2008(ዋኢማ)-ከ1 ነጥብ 1 ቢሊዮን ብር በላይ እና በርካታ ግምት ያላቸው ንብረቶችን ባጎደሉ አመራርና ፈፃሚዎች ላይ ምርመራ እያደረገ እንደሚገኝ የፌዴራል የስነ ምግባርና የፀረ ሙስና ኮሚሽን አስታወቀ።

ኮሚሽኑ ለህዝብ ተወካዮች ምክር ቤት የስድስት ወራት አፈጻጸም ሪፖርቱን ባቀረበበት ወቅት፥ በከፊሎቹ ላይ ክስ መመስረቱንም ገልጿል።

የመሬት አስተዳደር፣ ቀረጥና ታክስ ማጭበርበር፣ ኮንስትራክሽንን ጨምሮ በመንግስት ግዥና ሽያጭ፣ የፋይናንስ ተቋማት እና ሃሰተኛ ሰነድ መገልገል በስፋት ችግር የተስተዋለባቸው ተብለዋል።

1 ነጥብ 5 ሚሊየን ብር ጉቦ በመስጠት ከ144 ሚሊየን ብር በላይ የግብር እዳ ያስቀሩት ግለሰብ ላይ ክስ መመስረቱ በዚህ ጊዜ ተገልጿል።

ከዚህ በተጨማሪም የሊዝ ግምቱ 22 ሚሊየን ብር የሆነ ቦታ ከሊዝ ውጭ በመፍቀድ መንግስት ሊያገኝ የሚገባውን ጥቅም ያሳጡት ግለሰቦች ላይም ምርመራ እየተካሄደ ነው።

የኮሚሽኑ ምክትል ኮሚሽነር አቶ ወዶ አጦ እንዳሉት፥ ከ54 ሚሊየን ብር በላይ ጥሬ ገንዘብና የተለያዩ ንብረቶችን በማስመለስ ጥቂት የማይባሉ ንብረቶችን ማሳገድ ተችሏል።

በፍርድ ቤት ውሳኔ ካገኙት 103 መዝገቦች ውስጥ 88 ለኮሚሽኑ ውሳኔ የተሰጣቸው መሆኑን ተናግረዋል።

በተከሳሾች ላይ በተሰጠ የጥፋተኝነት ውሳኔ 85 በመቶ አፈጻጸም የታየ ሲሆን፥ በግማሽ ዓመቱ ካለፈው ዓመት የተዛወሩትን ጨምሮ 390 መዝገቦች ላይ ምርመራ ተደርጓል።

ኮሚሽኑ በሰራው የቅድመ መከላከል ስራም፥ ግልጽነት የሌላቸውና ከህግና ስርዓት ውጭ የሆኑ ግዥዎችን በማረም በተስተካከለ መንገድ ተፈጻሚ እንዲሆኑ ማድረጉም ነው የተገለጸው።

ከዚህ ጋር ተያይዞም በፊንጫ ስኳር ፋብሪካ፣ በአፈር እና ማዳበሪያ ግዥ እንዲሁም በአዲስ አበባ ሳይንስና ቴክኖሎጅ ዩኒቨርሲቲ የተካሄዱ ጨረታዎችን በመሠረዝ እንደገና እንዲካሄዱ አድርጓል።

ኮሚሽኑ ያቀረበውን ሪፖርት ተከትሎ ከመድረክ ለተነሱ ጥያቄዎችም፥ የኮሚሽኑ ምክትል ኮሚሽነር አቶ ወዶ አጦ ምላሽ ሰጥተውባቸዋል።(ኤፍ.ቢ.ሲ)