ለ15ኛው ዓለም አቀፍ የታዳጊ አገራት የከተማ ህዝብ እንቅስቃሴ ትብብር ጉባኤ ዝግጅት እየተደረገ ነው

አዲስ አበባ፣ መስከረም 10 /2005 (ዋኢማ) - በአዲስ አበባ የሚካሄደውን 15ኛው አለም አቀፍ የታዳጊ አገራት የከተማ ህዝብ እንቅስቃሴ ትብብር ጉባኤ የተሳካ ለማድረግ ዝግጅት እየተደረገ መሆኑን አዘጋጅ ኮሚቴው አስታወቀ።

የኮሚቴው አስተባባሪ አቶ በድሉ አሰፋ ትላንት ለጋዜጠኞች በሰጡት መግለጫ እንዳመለከቱት የአዲስ አበባ አስተዳደር ኮዳቱ ኢንተርናሽናል ከተባለ ድርጅት ጋር በመተባበር ለጉባኤው ስኬት የሚረዱ ዝግጅቶች እያደረገ ይገኛል ብለዋል።

ጉባኤው ከጥቅምት 12-15/2005 ዓ/ም በአፍሪካ ህብረት የመሰብሳቢያ አዳራሽ እንደሚካሄድም አስተባባሪው ተናግረዋል።

በጉባኤው ከ700 በላይ የአገር ውሰጥና የውጪ አገራት ታዳሚዎች እንደሚገኙ የገለጹት አቶ በድሉ ጉባኤው በመልማት ላይ ባሉ አገሮች ውስጥ የህዝብ ዝውውርን የተመቻቸ ለማድረግ ጠቀሜታው የጎላ መሆኑን አስረድተዋል።

በጉባኤው ከ30 በላይ ጥናታዊ ጽሁፎች እንደሁም የተለያዩ የፖሊሲ ሀሳቦችና አቅጣጫዎች ስለሚቀረቡ በሃገራት መካከል የልምድ ልውውጥ ለማድረግ እንደሚያግዝም  አስተባባሪው ተናግረዋል።

የተለያዩ አገራት የትራንስፖርትና የከተማ ልማት ሚኒስትሮችና ከጉዳዩ ጋር ግንኙነት ያላቸው ኩባንያ ሃላፊዎችም በጉባኤው ይገኛሉ ተብሎ እንደሚጠበቅ ዋልታ ኢንፎርሜሽን ማዕከል ዘግቧል፡፡