ድርጅቱ አምስት መርከቦችን መረከቡን ገለፀ

  • PDF

አዲስ አበባ፤ ግንቦት 12/2005/ዋኢማ/ - የኢትዮጵያ ባህር ትራንስፖርትና ሎጅስቲክ አገልግሎት ድርጅት የሚሰጠውን አገልግሎት ይበልጥ ለማሻሻል በ5 ቢሊየን ብር እያስገነባቸው ካሉት ዘጠኝ መርከቦች መካከል አምስቱን መረከቡን አስታወቀ።

የድርጅቱ የኮርፖሬት ኮሙኒኬሽን ስራ አስኪያጅ አቶ ኡስማን አሊ ለዋልታ ኢንፎርሜሽን ማዕከል እንደገለፁት፤ ድርጅቱ ከተረከባቸው መርከቦች መካከል ሁለቱ  ነዳጅ ጫኝ ሲሆኑ፤ ሶስቱ የደረቅ ጭነት የሚያጓጉዙ መርከቦች ናቸው።

ሁለቱን ነዳጅ ጫኝ መርከቦች ባህርዳር እና አዋሳ የሚል ስያሜ እንደተሰጣቸው ጠቁመው፤ የደረቅ ጭነት ማመላለሻ ጫኝ መርከቦቹን ደግሞ ፊንፊኒ፣ አሶሳና ጋምቤላ የሚል ስያሜ እንደተሰጣቸው ገልፀዋል።

ወደ ሀገር ውስጥ ያልገቡት አራት መርከቦች እስከ ነሐሴ መጨረሻ ድረስ እንደሚገቡ አቶ ኡስማን ተናግረዋል።

የመርከቦቹን ግዢ ከቻይናው ኤግዚም ባንክ በረዥም ጊዜ ሊከፈል በሚችል የ3 ቢሊየን ብር ብድርና 2 ቢሊየን ብር ደግሞ በራሱ ወጪ ማስገንባቱንም ገልፀዋል።

ድርጅቱ በአሁኑ ወቅት አገልግሎቱን እየሰጠ ያለው በስድስት መርኮች መሆኑን ገልፀው፤ ወደ ሀገር ውስጥ የገቡትንና የሚገቡትን ሲጨመሩ ያለውን የመርከብ ቁጥር ወደ 15 ከፍ የሚያደርገው ሲሆን የሚሰጠውን አገልግሎትም ከእጥፍ በላይ ያሳድገዋል ሲሉ ገልፀዋል።

እንደ አቶ ኡስማን ገለፃ ድርጅቱ "የመልቲ ሞዳል" ወይም በአንድ ላይ የተለያዩ አገልግሎቶችን በተሟላ መልኩ ለመተግበር የሚያስችል አቅም ለመፍጠር የሀገር ውስጥ ወደብ ተርሚናሎችን የማስተናገድ አቅምን ለማሳደግ የመሰረተ ልማት ግንባታዎችን፣ ቅርንጫፎችንና የሳተላይት ጣቢያዎችን የማስፋፋት ስራ መስራቱንም ተናግራዋል።

ድርጅቱ በጅቡቲ የገቢ እቃዎች የቆይታ ጊዜን ለመቀነስ የተለያዩ የአሰራር ማሻሻያዎችን ያደረገ ሲሆን፤ በወሰደው ተከታታይ የማሻሻያ እርምጃዎች የመልቲሞዳል ኮንቴይነሮች አማካይ በጅቡቲ ቆይታ ጊዜ በመስከረም 2005 ከነበረበት 63 ቀን ወደ 6 ቀን ዝቅ እንዲል አስችሎታል ብለዋል።

የኢትዮጵያ ባህር ትራንስፖርትና ሎጅስቲክ አገልግሎት ድርጅት ባለፈው አመት የኢትዮጵያ ንግድ መርከብ አክሲዮን ማህበር፣ የባህር ትራንስፖርትና የደረቅ ወደብ አገልግሎት ድርጅትን በአንድ ላይ በማዋሀድ እንደ አዲስ የተቋቋመ መስሪያ ቤት መሆኑ ይታወቃል።

ድርጅቱ ባለፈው አንድ አመት ጊዜ ውስጥም እራሱን የማደራጀት፣ የድርጅቱን የማዋቅር የማዘጋጀትና የሀገሪቱ የወጪና የገቢ እቃዎች አገልግሎት የመስጠት ስራው እንዳይቋረጥ የበኩሉን ድርሻ ሲወጣ የቆየ መስሪያ ቤት መሆኑን ዋልታ ኢንፎርሜሽን ማዕከል ዘግቧል።